1 Samuel 22

Ke’de’mi tu Daud inde to dio mai lussu’ mentilindung lan lo’ko’ Adulam. Tonna rangimi mintu’ siulu’na sia sangdadianna, solo’mi tu tau iato mai umpessitammui.

Sirampun nasangmi lako kalena tu mintu’ to lan kamakario-rioan sia mintu’ to kaindanan sia mintu’ to mapalla penaanna; iami umpangului tu tau iato mai, anna torro sola, tu agi-agi a’pa’ratu’ muane.

Tilelemi tu Daud inde to dio mai lako Mizpa lan lili’na Moab; anna ma’kada lako datu Moab, nakua: Elorampi tu indo’ ambe’ku torro sola mintu’ taummi sae lako kuissanna umba Napakuanna’ Puang Matua undinna.

Nasolammi Daud tu tau iato mai mentilindung lako datu Moab, anna torro sola lan mintu’ allo katorroanna Daud lan tambakuku iato.

Ma’kadami nabi Gad lako Daud, nakua: Da’ mutorro lan tambakuku iate, sangadinna tileleko lako tondok Yehuda. Tilelemi tu Daud, anna rampo tama pangala’ Keret.

Narangimi Saul te kareba iate, belanna kaissanammo tu Daud sola mintu’ passolanna. Unnisungmi tu Saul dio Gibea diong garonto’ kayu tamarisa’ dao inan madao sitoe doke namintu’ to mase’ponna bendan dio sa’dena patomali.

Ma’kadami Saul lako mintu’ tu to bendan dio sa’dena patomali, nakua: Perangiimi, e to Benyamin, ma’dinraka tu anak Isai la umbenkomi pa’lak sia pa’lak anggoro’? Ma’dinraka umpadadikomi pangulunna tau sangsa’bu sia pangulunna tau saratu’?

Ammi sanginaara sola nasang unneana’ sia moi misa’ te kamu sola nasang tae’ bangkomi umpokadanna’, kumua anakku kalena sipamangka kada tu anakna Isai. Sia moi misa’komi tae’mo tu ungkagianganna’ ba’tu umpokadanna’ tu diona anakku ussede taungku, dadi to la untobanganna’, susite totemo.

Mebalimi Doëg to Edom, tu bendan sola mintu’ to naala parea Saul, nakua: Kutiro tu anak Isai sae lako Nob umpessitammui Ahimelekh, anakna Ahitub,

tu umpekutananni lako PUANG tu diona a’ganna sia tu umbenni kinallo, sia naben tu pa’dangna Goliat, to Filistin.

Nasuami datu tu tau male untambai tu to minaa Ahimelekh, anakna Ahitub sia mintu’ sangdadianna, iamotu mintu’ to minaa dio Nob. Sae nasangmi tu tau iato mai mennolo lako datu.

Nakuami Saul: Perangii, e anakna Ahitub. Mebalimi nakua: Io puangku.

Nakuami Saul lako: Ma’apai ammi sanginaa sola nasang la unneana’, la kamu, la anak Isai, miurungan umbenni roti sia pa’dang sia mipekutanan lako Puang Matua tu a’ganna, kumua anna balina’ sia untobanganna’, susite totemo.

Mebalimi Ahimelekh nakua: Mintu’i tu taunna puangku mindara tu manappa’ susi Daud? Iamo minintunna puangku sia naala sangbilangan to ma’kampana puangku sia mala’bi’ lan banuanna puangku.

Mane iaraka te kupekutananni lako Puang Matua diona a’ganna? Inang tae’ iato! Da mipapassannina’ ba’tu sangdadiangku tu iannato, belanna moi misa’ tae’ kuissanni tu apa iato, la kapua, la bitti’.

Apa nakua datu: E Ahimelekh, manassa inang la dipateikomi, la kamu la mintu’ sangdadiammi.

Ma’kadami datu lako mintu’ to ma’kampana tu bendan dio sa’dena patomali, nakua: Iamo, pateimi tu mintu’ to minaanNa PUANG, belanna sanginaa duka Daud tu tau iato; naissan tu diona kamallaianna, anna tae’ napokadan bunina’. Apa tang tikambe limanna tu mintu’ surodadunna datu la urrokki tu mintu’ to minaanNa PUANG.

Nakuami datu lako Doëg: Iamo, rokki tu mintu’ to minaa iato. Malemi lako tu Doëg, to Edom, narokki tu mintu’ to minaa, napatei to allo iato tu muane karuapulona llima tu ma’bayu lamba’ mabusa.

Sia nabela’ nasang pa’dang tu mintu’ to dio Nob, tondokna to minaa iato, la muane la baine, la pia, la pia’-pia’ ma’susupa, ondongpi mintu’ sapi sia keledai sia domba napa’dangi nasang.

Dio mai tu mintu’ anakna Ahimelekh, anakna Ahitub, misa’ri tau lussu’, disanga’ Abyatar, male mallai unnula’ Daud.

Napokadami Abyatar lako Daud tu diona Saul umpatei tu mintu’ to minaanNa PUANG.

Nakuami Daud lako Abyatar: Kuissan dukato allo nanii Doëg, to Edom dio, manassa inang la napokadan Saul tu iannato. Aku napobannang tu diona kadipateianna mintu’ sangdadiammi.

Totemo melo ke torromoki’ sola. Da mimataku’, belanna iatu to undaka’ lalan la umpateina’, ia dukamo undaka’ lalan la umpateikomi, apa iake sibaaki’ la makarimmankomi.